18:38 04/05/2022
Një krim i rëndë brenda familjes ka ndodhur në qytetin Samarate në Itali.
Kryefamiljari Alessandro Maja 57 vjeç vrau bashkëshorten e tij Stefania Pivetta 56 vjeç dhe vajzën e tyre Giulia 16 vjeç, ndërsa plagosi djalin 23 vjeç si dhe tentoi të vetëvritej por është i plagosur.
Ngjarja ka ndodhur mëngjesin e kësaj të mërkure. Autori dyshohet se ka vrarë gruan dhe vajzën teksa ishin në gjumë. 57-vjeçari është një arkitekt i njohur në vendin fqinj. Asnjëherë në familjen e tyre nuk është raportuar për episode dhune, prandaj dhe krimi tronditi komunitetin në zonën ku ndodhi tragjedia.
Në tentativë për të vrarë veten, 57-vjeçari mbeti i plagosur dhe është në spital. Ai mbahet i arrestuar nga policia. Po kështu, edhe djali i tij ka mbetur i plagosur në gjendje të rëndë.
Hetuesit thonë se do të përpiqen të mësojnë nga 23-vjeçari të gjithë dinamikën e ngjarjes.
Dyshohet se krimi makabër mund të ketë ndodhur pas kërkesës për divorc nga ana e bashkëshortes. /tvklan.al
