Dita 32 e luftës/ Rusia shkatërron depot e naftës dhe magazinat ushqimore të Ukrainës, Zelenskyy kërkon armatime nga Perëndimi

08:30 27/03/2022

◾Sot bëhen 32 ditë nga moment kur Rusia sulmoi ushtarakisht Ukrainën.

◾Presidenti i Ukrainës, Volodymyr Zelenskyy i ka bërë thirrje Perëndimit që ta furnizojë me më shumë armatime vendin e tij.

◾Presidenti amerikan Joe Biden paralajmëroi Presidentin Putin të mos shkojë më tej.

◾Shpërthime dhe bombardime nga Rusia u dëgjuan në qytetin Lviv, qyteti që mban të lodhur Ukrainën me Perëndimin.

◾Rusia ka vazhduar bombardimet mbi Ukrainën, duke shkatërruar depot e naftës dhe magazinat ushqimore.

Rusia goditi Lvivin me raketa me precizion të lartë

Ministria ruse e Mbrojtjes ka deklaruar se një ditë më parë qyteti Lviv në Ukrainë u godit me raketa me precizion të lartë të lëshuara nga anijet luftarake.

Forcat ruse goditën me raketa me rreze të gjatë një depo karburanti që përdorej nga forcat ukrainase pranë Lviv, si dhe një fabrikë që shërbente për riparimin e sistemeve anti-ajrore.

“Forcat e Armatosura të Federatës Ruse vazhdojnë aksionet sulmuese si pjesë e operacionit special ushtarak”, deklaroi Ministria ruse e Mbrojtjes.

Në deklaratë thuhet gjithashtu se Rusia përdori raketa me rreze të gjatë me precizion të lartë për të shkatërruar një arsenal të sistemit raketor S-300 dhe sisteme raketore anti-ajrore pranë Kievit. Ministri bëri të ditur edhe se kishin shkatërruar disa dronë ushtarakë të përdorura nga Ukraina.

“Çfarë po bën NATO”, Zelenskyy kërkon armatime nga Perëndimi: Avionët rusë nuk rrëzohen me mitralozë

Presidenti i Ukrainës Volodymyr Zelenskyy i ka bërë thirrje vendeve Perëndimore që të furnizojnë vendin e tij me më shumë armë. Ai kërkon avionë, tanke dhe sisteme të mbrojtjes raketore.

Përmes një video-deklarate gjatë natës, Zelensky tha se avionët e Rusisë nuk mund të rrëzohen me mitralozë, duke kërkuar kështu me shumë armë dhe sisteme të sofistikuara.

“Çfarë po bën NATO? A po e udhëheq Rusia? Çfarë presin? Kanë kaluar 31 ditë. Ne kërkojmë vetëm 1% të asaj që ka NATO, asgjë më shumë”, tha Zelenskyy.

Ndërkohë, Kryeministri i Sllovakisë, Eduard Heger, i tha BBC se është i gatshëm që t’i dërgojë Ukrainës sistemin e raketave të mbrojtjes ajrore S-300, prodhim sovjetik.

“Sanksionet mund të hiqen nëse Rusia ndalon pushtimin kundër Ukrainës”

Sekretarja e Jashtme e Britanisë së Madhe, Liz Truss thotë se sanksionet kundër Rusisë mund të hiqen nëse Moska i jep fund pushtimit të Ukrainës. Nëse kjo ndodh, sanksionet mund të hiqen edhe ndaj bizneseve e oligarkëve rusë.

“Këto sanksione mund të hiqen vetëm me një armëpushim dhe tërheqje të plotë, por edhe me angazhimin se nuk do të ketë agresion tjetër”, tha Truss.

Por Sekretarja e Jashtme theksoi se këto sanksione do të vendoseshin sërish nëse Presidenti Putin do të sulmonte sërish.

Në Ministrinë e Jashtme të Britanisë është krijuar një ekip negociatash, tha ministrja Truss, që mund të ndihmojë në bisedimet mes Rusisë dhe Ukrainës.

“Rusia godet magazinat ushqimore dhe depot e naftës”

Rusia ka nisur të shkatërrojë depot e naftës dhe magazinat ushqimore të Ukrainës. Deklarata është bërë nga një këshilltar i ministrit të Brendshëm të Ukrainës.

Kjo do të thotë që qeveria ukrainase do të duhet që së shpejti të shpërndajë stoqet e rezervave ushqimore dhe naftës.

Vadym Denysenko tha gjithashtu për një televizion ukrainas se Rusia po dërgon më shumë forca ushtarake dhe mund të tentojë të avancojë akoma më shumë.

REDAKSIA TVKLAN.AL

Burimi informacionit @TvKlan: Lexo me shume ne : www.botasot.al

Spread the love

Similar Posts

Leave a Reply

Your email address will not be published.