“E rritën naftën me 10 lekë që vetëm të vjedhin”- Vasili: Të shkrihet bordi i hajdutëve, po grabit përditë qytetarët









Deputeti i Partisë së Lirisë, Petrit Vasili, ka kërkuar shkrirjen e Bordit të Transparencës për përcaktimin e çmimeve të naftës.

petrit vasili

Gjatë një konference nga selia e PL-së, Vasili i kërkoi maxhorancës të respektojë rekomandimet e Bankës Botërore për shkrirjen e bortit, të cilin ai vet e cilësoi si një mekanizëm vjedhje të përditshëm për qytetarët.

Vasili shtoi se projektligji i propozuar nga Partia e Lirisë për heqjen e taksës së qarkullimit dhe karbonit, që do të sillte më pas uljen e çmimit të naftës, nuk pranohet nga qeveria Rama, pasi me lekët që vidhen nga hidrokarburet paguhen inceneratorët dhe kriminelët e qeverisë.

Deklarata e plotë e deputetit të Partisë së Lirisë, Petrit Vasili

Përshëndetje!

Bordi i Hajdutëve apo Transparencës siç e quan qeveria u vetëasgjësua me vendimin e tij të fundit për rritjen 10 lekë të çmimit të naftës. Duke e çuar atë në 229 lekë.

Ky vendim, është një vjedhje e hapur dhe flagrante pasi vetë argumentet e bordit e rrëzojnë atë plotësisht.

Shoqata e Hidrokarbureve ka evidentuar qartë se rritja e naftës në bursen Platzz ishte vetëm 3 dollarë me një efekt prej 3 lekë për litër, ndërkohë që bordi e rriti 10 lekë për litër. Do të thotë që 7 lekë të tjera do të vinin si pasojë e rritjes së kursit të dollarit. Por në fakt, duke ju referuar Bankës së Shqipërisë ka ndodhur krejtësisht e kundërta. Pasi kursi i dollarit në raport me lekun ka një rënie prej 1.5 pikësh, duke arritur në 120.47 nga rreth 122 që ishte më parë.

Kjo rënie që vazhdon, e sot që flasim ka arritur në 118.85 e megjithatë bordi në vend që ta ulte sipas argumentave të veta vazhdon ta mbajë të rritur.

Është shumë e qartë, që ky bord është një grup hajdutësh ku të dy palët qeveri dhe oligarkët e ulur në tavolinë kanë vetëm një motiv sesi të vjedhin gjithmonë dhe më shumë shqiptarët.

Qeveria mbush arkën për të paguar koncesione dhe tendera e të tjerë. Kurse oligarkët mbushin xhepat e tyre dhe të qeverisë.

Prej kohësh kemi kërkuar shkrirjen e menjëhershme të këtij bordi hajdutës, gjë të cilën e ka kërkuar qartë edhe Fondi Monetar Ndërkombëtar i cili thotë: “Duke marrë parasysh sfidat e bordit të transparencës që monitoron çmimet e disa artikujve ushqimorë bazë, ne e shohim me vend zëvendësimin e tij me mbështetje të mirorientuar për të varfrit dhe shtresat e ekspozuara me qëllim mbrojtjen e tyre nga efektet e rritjes së çmimeve. Për këtë arsye, përpjekjet për përmirësimin e sistemit të mbrojtjes sociale në vend duhet të vazhdojnë, duke përfshirë dhe zgjerimin e mbulimit të shtresës së varfër dhe në nevojë në sektorin informal”.

Kemi propozuar që 7 muaj më parë një projektligj në Parlament për pezullimin e taksës së qarkullimit dhe të karbonit por qeveria që ka rrëmbyer prej gryke dhe Parlamentin e ka bllokuar me çdo mjet shqyrtimin e tij.

E ka bllokuar sepse nuk ka asnjë interes që të lehtësojë shqiptarët nga dara e çmimit të rritur të naftës por kërkon t’i zhvasë me çdo mjet dhe mënyrë.

Është fakt asgjësues që çmimet e naftës në Kosovë, Maqedoni e Mal të Zi i nxjerrin bojën qeverisë së Rilindjes.  Pasi Kosova e ka çmimin 1.6 euro, Maqedonia 1.48 dhe Mal i Zi 1.68, ndërkohë që Shqipëria e ka çmimin rreth 2 euro për litër. Diferenca e vetme midis tyre është sepse në këto vende ka qeveri të përgjegjshme kurse në Shqipëri ka një qeveri hajdute.

Rruga e vetme që shqiptarët të mos vidhen më e të mos largohen nga vendi i tyre është vetëm shporrja një orë e më parë e kësaj qeverie grabitqarësh dhe rrëmbyesish.

© Panorama.al Burimi informacionit @Panorama.al: Lexo me shume: www.botasot.al

Spread the love

Similar Posts

Leave a Reply

Your email address will not be published. Required fields are marked *