Formula/ 85 lekë një votë, zbulohet sa para do të përfitojnë partitë që garuan më 25 prill! Por, cilat subjekte nuk do marrin asnjë lekë








Partitë që morën pjesë në zgjedhjet e 25 prillit do të marrin 85 lekë të reja për çdo votë të vlefshme që kanë çuar në kutinë e tyre dyfish më shumë krahasuar me zgjedhjet e vitit 2017.

kqz

Kjo për shkak të ndryshimeve në Kodin Zgjedhor që u bënë një vit më parë me konsensusin e të gjitha palëve. Në bazë të nenit 180 pika 4 të Kodit Zgjedhor të ndryshuar, në zgjedhjet e para pas hyrjes në fuqi të këtij ligji, fondi nga Buxheti i Shtetit për financimin e partive pjesëmarrëse në zgjedhje përcaktohet se do të jetë 2 herë më i madh, se fondi i alokuar për zgjedhjet e përgjithshme të vitit 2017.

Kryekomisioneri Ilirjan Celibashi do të miratojë të hënën që vjen shumën që do të përfitojë çdo parti politike që mori pjesë në këto zgjedhje, ndërsa formula do jetë si më poshtë. “Fondi i vënë në dispozicion në vitin zgjedhor 2017 ishte 65,000,000 lekë, pra rrjedhimisht u caktua që për vitin zgjedhor 2021 fondi i përgjithshëm i miratuar të ishte 130,000,000 lekë. Pjesëtimi i fondit të përgjithshëm të miratuar me numrin në total të votave të vlefshme të grumbulluara nga partitë politike pjesëmarrëse në zgjedhje, që kanë marrë jo më pak se 1 për qind të votave të vlefshme në shkallë vendi, sjell si rezultat vlerën në para të një vote të vlefshme. 130,000,000 (njëqind e tridhjetë milionë) lekë / 1,533,334 (një milion e pesëqind e tridhjetë e tre e treqind e tridhjetë e katër) vota = 84,78 ( H” 85) lekë”, thuhet në projektvendimin e kryekomisionerit.

SA PËRFITOJNË

Partia Socialiste, si partia që siguroi më shumë vota në zgjedhjet e 25 prillit, do të jetë edhe subjekti që do të marrë edhe pjesën më të madhe të fondit që do të shpërndajë Komisioni Qendror i Zgjedhjeve. Rreth tre muaj më parë, në zgjedhjet parlamentare Partia Socialiste që mori për herë të tretë mandatin për të qeverisur vendin, çoi në kutitë e saj 768134 vota. Për të nxjerrë shumën që do të përfitojë PSja, numri i votave shumëzohet me 85 lekë, sa është përllogaritur një votë. Sipas përllogaritjes me këtë formulë, maxhoranca do të çojë në arkën e partisë rreth 65 milionë lekë të reja ose e thënë ndryshe 650 milionë lekë të vjetër. Ndërkohë, partia e dytë që do të përfitojë më shumë lekë nga fondi që do shpërndajë KQZ-ja është Partia Demokratike Aleanca për Ndryshim. PD-ja mori 622187 vota në zgjedhjet e 25 prillit. Të shumëzuara më 85 lekë për çdo votë të vlefshme, PD-ja çon në arkat e partisë së saj 52 milionë lekë të reja ose 520 milionë lekë. Partia Lëvizja Socialiste për Integrim mori 107.538 vota, të cilat përkthehen në 9 milionë lekë ose thënë ndryshe 90 milionë lekë të vjetër. Në borderonë e KQZ-së për të marrë pjesën e saj nga zgjedhjet është edhe Partia Socialdemokrate e Tom Doshit, e cila mori 3 mandate deputetësh në zgjedhjet e fundit. PSD-ja mori gjithsej 35475 vota që përkthehen në të ardhura në 3 milionë lekë të reja afërsisht, ose e thënë ndryshe 30 milionë lekë të vjetër.

ALEATËT

Ndryshimet e Kodit zgjedhor që u miratuan pa konsensusin e opozitës në tetor të vitit 2020 duket se i kanë dhënë një “shkelm” drejt greminës partive të vogla që garuan në një listë me Partinë Demokratike. Bazuar edhe në projektvendimin që ka publikuar Komisioni Qendror i Zgjedhjeve, asnjë nga partitë aleate që ishin në një koalicion me PD-në nuk do të përfitojnë të ardhura. Gazeta “Panorama” mëson se në KQZ kjo çështje diskutohet prej tri javësh dhe ende nuk ka një dakordësi në unanime në leximin e kodit. Burimet bëjnë me dije për gazetën “Panorama” se, vendimi përfundimtar pritet të jetë që partitë e koalicionit që kanë garuar në një listë të mos përfitojnë fond nga KQZ-ja. Ndërkohë nga ana tjetër, janë përfaqësuesit e partive të vogla që pohojnë se nëse vendimi do të jetë i tillë, do ta ankimojnë. Shpërndarja e parave duket se do të jetë edhe një tjetër sprovë mes PD-së dhe aleatëve të saj. Gjatë një seance pak kohë më parë në Gjykatën Kushtetuese, ku ishte përfaqësuesi ligjor i të gjitha partive aleate të PD-së, u pyet nëse brenda koalicionit kishte një marrëveshje ekonomike për shpërndarjen e fondeve. Mbetet të shihet se si do të jetë vendimi i partisë kryesore, nëse partitë e vogla nuk do të përfitojnë para, a do të ketë shpërndarje fondesh nga PD-ja për aleatët.

FONDET PËR PARTITË

  1. Partia Socialdemokrate (PSD) 35475 vota X 85 lekë= 3.015.375 lekë 2. Lëvizja Socialiste për Integrim (LSI) 107538 vota X 85 lekë= 9.140.730 lekë 3. Partia Demokratike (PD-AN) 622.187 vota X 85 lekë= 52.885.895 lekë 4. Partia Socialiste (PS) 768.134 vota X 85 Lekë= 65.291.390 lekë

Projektvendimi/formula

Në bazë të nenit 180 pika 4 të Kodit Zgjedhor të ndryshuar, në zgjedhjet e para pas hyrjes në fuqi të këtij ligji fondi nga Buxheti i Shtetit për financimin e partive pjesëmarrëse në zgjedhje përcaktohet se do të jetë 2 herë më i madh se fondi i alokuar për zgjedhjet e përgjithshme të vitit 2017. Fondi i vënë në dispozicion në vitin zgjedhor 2017 ishte 65,000,000 lekë, pra rrjedhimisht u caktua që për vitin zgjedhor 2021 fondi i përgjithshëm i miratuar të ishte 130,000,000 lekë.

Pjesëtimi i fondit të përgjithshëm të miratuar me numrin në total të votave të vlefshme të grumbulluara nga partitë politike pjesëmarrëse në zgjedhje që kanë marrë jo më pak se 1 për qind të votave të vlefshme në shkallë vendi, sjell si rezultat vlerën në para të një vote të vlefshme 130,000,000 (njëqind e tridhjetë milionë) lekë / 1,533,334 (një milion e pesëqind e tridhjetë e tre e treqind e tridhjetë e katër) vota = 84,78 ( H” 85) lekë

© Panorama.al Burimi informacionit @Panorama.al: Lexo me shume: www.botasot.al

Spread the love

Similar Posts

Leave a Reply

Your email address will not be published. Required fields are marked *