Gjermania në hall, qytetarët nuk po paraqiten për t’i marrë vaksinat kundër COVID-19

Një numër në rritje i gjermanëve nuk po paraqiten për t’i marrë vaksinat kundër COVID-19, sipas orareve të caktuara, duke nxitur thirrjet në vend për vendosje të gjobave, teksa Gjermania po nxiton për imunizimin e popullatës, për të luftuar përhapjen e shpejtë të variantit më ngjitës, Delta.

Mario Czaja, shef i Kryqit të Kuq në Berlin, ka thënë se 5 deri në 10 për qind e njerëzve nuk po i respektojnë oraret në qendrat e vaksinimit në kryeqytetin gjerman, veçanërisht për marrjen e dozave të dyta, për dallim prej fillimit të vitit, kur më pak se 0.5 për qind nuk paraqiteshin për vaksinim, raporton Reuters.

Me rreth 15.000 vaksinime të planifikuara për çdo ditë në qendrat e qytetit, numri i orareve që nuk po respektohen po “ndikon shumë në shtrirjen e vaksinimit në Berlin”, ka thënë Czaja për radion Deutschlandfunk, të hënën.

“Na duhen oraret e lirë. Ende s’e kemi kaluar rrezikun dhe s’mund t’ia lejojmë vetes neglizhencën”, ka thënë ai, duke i bërë thirrje njerëzve që t’i anulojnë oraret nëse kanë arritur ta marrin dozën e dytë më herët, diku tjetër.

Përkundër mosrespektimit të orareve, Czaja ka thënë se qendrat nuk janë detyruar t’i hedhin poshtë vaksinat, sepse pasi të shkrihen, ato mund të ruhen për tre deri në katër ditë nëpër frigoriferë.

Njerëzit mund të jenë duke munguar në oraret për dozat e dyta, sepse ata mund të jenë vaksinuar nga mjeku i familjes apo i kompanisë, apo mund të jenë në pushime, ka thënë Christian Fuellers, drejtor mjekësor i një qendre vaksinimi në landin e Rinit Verior-Vestfalisë, në një prononcim për televizionin ARD.

Kancelarja gjermane, Angela Merkel, dëshiron që Gjermania të arrijë një shkallë vaksinimi prej 80 për qind, ka thënë për Reuters një pjesëmarrës në një takim të komitetit ekzekutiv të partisë së saj.

Rreth 39 për qind e gjermanëve tashmë i kanë marrë që të dy dozat e rekomanduara, përderisa 56.5 për qind kanë marrë vetëm nga një dozë.

Gjermania, vendi më i banuar në Evropë, dhe ekonomia më e madhe e kontinentit, pritet të pranojë plot 7.65 milionë doza të vaksinës kundër COVID-19 këtë javë, sipas të dhënave të Ministrisë së Shëndetësisë, prej të cilave 4.95 milionë do t’i dërgohen qendrave të vaksinimit.

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb

Burimi informacionit @BalkanWeb: Lexo me shume ne : www.botasot.al

Spread the love

Similar Posts

Leave a Reply

Your email address will not be published. Required fields are marked *