Nga UVIL ZAJMI
Ka qenë dhe mbetet numri 9 më i fortë në futbollin botëror. Gerd Myler është ndarë nga jeta në moshë 75-vjeçare nga Alzheimeri, prej të cilit vuante prej më shumë se dhjetë vitesh. Lojtar i Bajernit të Mynihut, i kombëtares së RF Gjermane, shënues absolut në tre botërorë, ‘66-‘70-’74, kampion Europe 1972, kampion bote 1974 (autori i golit të dytë në finalen 2-1 ndaj Holandës), tri herë fitues i Kupës së Kampioneve me Bajernin dhe i katër titujve në Bundesligë.
Realizues në të gjitha mënyrat, që edhe sot flitet ende për të nga sportdashës, futbollistë, opinionistë, trajnerë, të pasionuarit, që janë të lidhur me imazhin e krijuar nga bomberi gjerman. Statistikat e karrierës së tij të shkëlqyer janë vërtet të frikshme: 563 gola shënuar me Bajernin në 605 takime dhe 68 gola në 62 ndeshje realizuar me kombëtaren, 5 prej të cilëve i ka ndaj Shqipërisë.
Gerd Mylerin kemi pasur fatin ta shohim nga afër në “Qemal Stafën” tonë. Hera e parë me kombëtaren e RF Gjermane, asokohe nënkampione e botës, pas finales së humbur në “Uembli” 1966, Angli-RF Gjermane 4-2, daton në vitin 1967, në Dortmund. Ka qenë 8 prill, e shtunë dhe luhej për eliminatoret Kampionatit Europian. Ndodheshim në Grupin 4 dhe ndeshja RF Gjermane-Shqipëri përfundoi 6-0 për vendësit. Gerd Myleri ishte autor i katër golave: ‘5, ’23, ‘73, ‘85 (11m).
Ndërsa në ndeshjen e dytë, atë të 17 dhjetorit 1967, Gerd Myler nuk do të vinte në Tiranë dhe Gjermania do të eliminohej pas barazimit të bujshëm 0-0 në “Qemal Stafa”. Por, Myler do të jetë vendimtar në takimin e tretë, ndër më historikët e zhvilluar në kryeqytetin tonë. Ka qenë e mërkurë 17 shkurt 1971 dhe luhej për eliminatoret e Kampionatit Europian. Ndodheshim në Grupin 8 dhe ndeshja Shqipëri-RF Gjermane përfundoi 0-1. Shënues, i përhershmi Gerd Myler në minutën e 38-të. Ka qenë një ndeshje përtej një 90-minutëshi, spektakolare, përballë skuadrës më të famshme të RF Gjermane në historinë e saj. Interesim i jashtëzakonshëm në Tiranë dhe kuriozitet i madh për të parë RFGJ-në e Majerit, Bekenbauerit, Shnelingerit, Overatit, Netzerit, Mylerit, Hejnkesit dhe Grabovskit.
Të sistemuar në hotel “Dajti, stërvitja u krye një ditë më parë në stadiumin “Dinamo”, e cila u ndoq nga mijëra shikues. Kohë më vonë u përfol edhe për simpatinë e Mylerit me kamerieren e hotel “Dajtit”. U spekulua shumë mbi dashurinë e pamundur të ish-sulmuesit gjerman me një bukuroshe shqiptare, por asnjëherë nuk u saktësua identiteti i saj. Flitej se quhej Hëna, por vetëm kaq.
Ndërkaq, ndeshja u luajt në një kohë të vrenjtur, tipike dimër, terren rrëshqitës dhe minuta fatale për kuqezinjtë rezultoi e 38-ta: pas ekzekutimit të një faulli pa pretendime nga Netzer, brenda zonës, Myler i ka shpëtuar mbulimit të Canit e Kasmit, dhe me të majtën nga 12 metra pak diagonal ka realizuar në gjysmëlartësi në të djathtë të Dinellës nga porta veriore. 1- 0, dhe në atë edicion, Gjermania Federale do të shpallej kampione e Europës.
PANORAMASPORT.AL
© Panorama.al Burimi informacionit @Panorama.al: Lexo me shume: botasot.al
