“Kushëriri i kryebashkiakut të Fushë-Arrëzit”, denoncimi i PD: RENEA arrestoi policin në Pukë për një parcelë me kanabis, lirohet më pas










pd-renea-kanabis

Partia Demokratike ka publikuar një denoncim sipas të cilës është fshehur arrestimi i një oficeri të policisë gjyqësore në Pukë për kultivim të lëndëve narkotike.

Sipas selisë blu, RENEA ka ndërhyrë ditën e sotme në zonën e Pukës ku ka evidentuar një parcelë të mbjellur me kanabis për të cilën arrestoi oficerin e policisë gjyqësore Kastriot Bicukaj.

Më tej, sipas këtij denoncimi thuhet se ai ka përfituar lirinë nga kryebashkiaku i Fushë-Arrëzit, Fran Tuci të cilin e ka kushëri, në vend që çështja t’i kalonte SPAK-ut.

PD thotë se kjo vjen si pasojë e mbrojtjes së shtetit për të favorizuar kriminelët. PD thotë se vendi ynë renditet e para në Europë nga OKB për kultivimin e lëndëve narkotike.

DEKLARATE E PARTISE DEMOKRATIKE

Ndarja e politikës nga krimi dhe lufta ndaj trafikut të drogës, që cënon rendin dhe sigurinë, është mision i Partisë Demokratike. Në këtë përballje nuk jemi vetëm, por kemi mbështetjen e qytetarëve dhe policëve të ndershëm, që ndihen të braktisur nga regjimi që bashkëpunon me krimin. I tillë është denoncimi që na ka ardhur sot mbi ndërhyrjen e forcave RENEA në zonën e Pukës. Operacioni ka zbuluar një parcelë të madhe të mbjellur me kanabis, në kuadër të po këtij operacioni është ndaluar oficeri i policisë gjyqësore Kastriot Bicukaj. Kjo çështje duhet t’i kalonte menjëherë SPAK, por oficeri është lënë i lirë duke e kaluar çështjen pranë Prokurorisë së Pukës, falë mbrojtjes politike që ai gëzon prej kushëririt të tij Fran Tuci, kryetar i bashkisë së Fushë-Arrëzit.

Ky operacion, i cili nuk është bërë ende publik nga Policia e Shtetit, dëshmon edhe njëherë se kanabisi është ende një çështje në duart e atyre që e kthyen Shqipërinë në Kolumbinë e Europës dhe se askush nuk ndalohet nëse pas rrënjëve të bimës narkotike shfaqen persona të lidhur me partinë-shtet. Vendi ynë renditet nga Organizata e Kombeve të Bashkuara si i pari në Europë për prodhimin e kanabisit, pikërisht prej vullnetit politik që e kthen kanabisin në një ndërrmarrje të përbashkët midis krimit dhe partisë në pushtet, ndërsa policinë e shndërron në mbrojtëse të parcelave, apo siç dëshmon hetimi i Antimafies Italiane, duke i përdorur forcat e rendit si punëtorë krahu për ngarkimin e gomoneve me drogë.

Prej vitesh Partia Demokratike ka denoncuar me fakte modelin e bashkëpunimit me krimin të ndërtuar nga Edi Rama. Koha na ka dhënë gjithmonë të drejtë, prandaj nuk duhet pritur që detyrën e institucioneve shqiptare ta kryejnë partnerët ndërkombëtarë, por është detyra e SPAK të marrë në dorë këtë hetim të penguar nga partia në pushtet. Çrrënjosja e krimit dhe korrupsionit kërkon një drejtësi reaguese, të gatshme t’u kthej besimin qytetarëve dhe policëve të ndershëm që pengohen në kryerjen e detyrës së tyre.

© Panorama.al Burimi informacionit @Panorama.al: Lexo me shume: www.botasot.al

Spread the love

Similar Posts

Leave a Reply

Your email address will not be published. Required fields are marked *