Rindizen shqetësimet mbi sigurinë e “AstraZeneca”-s/ OBSH këmbëngul: Të vijohet përdorimi, rastet e rralla duhet të…



vaksina astrazeneca gjermaniRindizen debatet dhe shqetësimet mbi sigurinë e vaksinës “AstraZeneca”. Një ditë pasi Danimarka ndërmori vendimin ekstrem të bllokimit të vaksinave, duke i dhuruar dozat që kishte gjendje vendeve të treta, vende të tjera, Norvegjia dhe Islanda vendosën ta heqin “AstraZeneca”-n nga lista e alternativave për vaksinimin e qytetarëve.

Instituti i Shëndetit Publik norvegjez deklaroi dje se duhet të ndërpresin përdorimin e saj, pas komplikacioneve të rralla e të rënda pas injektimit. “Krahasuar me marsin, kur vendosëm pezullimin e përkohshëm, sot dimë shumë më tepër për lidhjet mes vaksinës dhe incidentet e rralla të trombozës, mpiksjes së gjakut dhe hemorragjisë. Bazuar në këto njohuri, rekomandojmë që vaksina ‘AstraZeneca’ të largohet nga programi i vaksinimit në Norvegji”, deklaroi drejtori i Kontrollit të Infeksioneve në ISHP-në norvegjeze, Geir Bukholm.

BLLOKIMET

Pas Danimarkës e Norvegjisë që e kanë hequr “AstraZeneca”-n nga lista, më herët, Holanda, Gjermania, Spanja, Italia dhe Irlanda kanë pezulluar këtë vaksinë te personat nën 60 vjeç. Franca rekomandon që “AstarZeneca” t’u jepet personave mbi 55 vjeç, ndërsa Tajlanda dhe Bullgaria deklaruan këtë javë se do të vonojnë shpërndarjen e dozave me qëllim hetimin e rasteve. Por, ka dhe shtete që mendojnë ndryshe, si Australia dhe Kanadaja, që deklaruan se do të vijonin injektimet, pasi nuk kishin gjetur asnjë provë për të ndryshuar kurs. Danimarka këtë javë u bë vendi i parë që ndërpreu përdorimin e vaksinës “AstraZeneca”, ndërsa zyrtarët europianë vazhdojnë të analizojnë dhjetëra raporte të mpiksjeve shumë të rralla të gjakut.

Përpara një muaji, vetëm pak ditë para se në vendin tonë të mbërrinin dozat e para, u ngritën shqetësimet fillestare mbi trombozat që shkaktonte injektimi i “AstraZeneca”-s. Një listë e gjatë shtetesh i thanë “JO” përkohësisht asaj, për të rifilluar përdorimin dhjetë ditë më vonë. Deklarata e Agjencisë Europiane të Barnave vetëm sa shoi flakën, por jo zjarrin e dyshimeve që u rindez sërish në prill mbi efektet negative që çonin deri në humbjen e jetës së të vaksinuarve. EMA pretendon se benefitet e vaksinës tejkalojnë rreziqet, por gjithashtu në listën e efekteve anësore kanë kërkuar që të shënohen përpos të tjerash edhe mpiksjet e gjakut. Ndonëse gjerësisht njihet si “AstraZeneca”, pas dëmtimit të imazhit, kompania britaniko-suedeze ka riemërtuar vaksinën e saj në 25 prill me “Vaxzevria”.

OBSH

Organizata Botërore e Shëndetësisë këmbëngul se nuk ka ndonjë arsye për të ndaluar përdorimin e “AstraZeneca”-s, pas frikës dhe dyshimeve për mpiksje gjaku, ndërkohë që Shtetet e Bashkuara tejkaluan shifrën e 100 milionë dozave të administruara. Sidoqoftë, OBSH-ja tha se komiteti këshillimor ka shqyrtuar të dhënat e sigurisë dhe ka dalë në konkluzionin që duhet të vijohet me përdorimin e saj, teksa shton se çdo shqetësim mbi sigurinë duhet të hetohet. Rregullatori mjekësor në Mbretërinë e Bashkuar zbuloi se 79 persona (2/3 e tyre gra) pësuan trombozë, pasi morën dozën e parë të vaksinës. Nëntëmbëdhjetë prej tyre vdiqën në një kohë që 20 milionë doza vaksinash “AsraZeneca” ishin administruar në vend deri në fund të marsit. Sipas ekspertëve britanikë, katër në një milion persona pritet të zhvillojnë këtë komplikacion të rrallë. Sërish, ata këmbëngulin për më tepër prova që lidhin mpiksjet e gjakut me vaksinën. Sidoqoftë, ata rekomandojnë që për personat nën 30 vjeç të ofrohen alternativa të tjera vaksinash, jo “AstraZeneca”. Sipas tyre, kushdo që përjeton mpiksje pas dozë së parë nuk duhet ta marrë të dytën. Gjithashtu, edhe njerëzit që kanë çrregullime të gjakut duhet të marrin “AstraZeneca”-n vetëm kur përfitimet nga ajo tejkalojnë rrezikun.

© Panorama.al Burimi informacionit @Panorama.al: Lexo me shume: www.botasot.al

Spread the love

Similar Posts

Leave a Reply

Your email address will not be published. Required fields are marked *