Një vajzë nga Arizona, e cila u zhduk gati katër vjet më parë, është paraqitur në një stacion policie në Montana.
Alicia Navarro dyshohet se u arratis në vitin 2019.
Të martën, policia në qytetin e saj të lindjes, Glendale, Arizona, tha se ajo u paraqit në një departament policie rreth 64 km nga kufiri SHBA-Kanada.
“Mrekullitë ekzistojnë”, tha nëna e saj Jessica Nunez në një postim në Facebook.
Kur Alicia u zhduk nga shtëpia e tyre më 15 shtator 2019, atëherë 14-vjeçare, la pas një shënim të nënshkruar ku shkruhej: “Unë ika. Do të kthehem, betohem. Më fal”.
Por nëna e saj i tha CBS News se ajo besonte se vajza e saj ishte joshur nga dikush që e kishte njohur në internet.
“Kjo nuk është diçka që ka ndodhur papritmas,” tha ajo, “dhe unë besoj se ajo ishte joshur duke menduar se do të kishte një lloj aventure, festë apo ndoshta dashuri.”
Adoleshentja ishte diagnostikuar me spektrin e autizmit dhe ishte një lojtare e zjarrtë e videolojërave.
Në një konferencë shtypi të martën, zëdhënësi i policisë së Glendale, Jose Santiago tha se Alicia, tani 18 vjeçe, kishte hyrë e vetme në stacionin e policisë në Montana dhe kishte identifikuar veten.
Ajo kërkoi ndihmë për ta pastruar nga lista e të miturve të zhdukur, por dukej e sigurt, e shëndetshme dhe e lumtur, tha ai. Santiago shtoi se ajo dukej se ishte larguar me dashje nga shtëpia dhe nuk ishte në “asnjë lloj telashi”.
Është e paqartë se si Alicia arriti deri në Montana, e cila është më shumë se 1,900 km larg shtëpisë së saj, dhe çështja mbetet nën hetim.
Zonja Nunez njoftoi kthimin e sigurt të vajzës së saj në një video në faqen Finding Alicia në Facebook, por tha se nuk kishte detaje.
“Dua t’i jap lavdi Zotit që iu përgjigj lutjeve dhe për këtë mrekulli,” tha ajo. “Për të gjithë ata që u mungojnë të dashurit, dua që ju ta përdorni këtë rast si shembull. Mrekullitë ekzistojnë. Asnjëherë mos e humbni shpresën dhe luftoni gjithmonë.”
Togeri Scott Waite u tha gazetarëve se nënë e bijë patën një ribashkim “emocionalisht dërrmues”, në të cilin Alicia kërkoi shumë falje për atë që i bëri nënës së saj.
Burimi informacionit @BalkanWeb: Lexo me shume ne : bota sot www.botasot.al
