Zelanda e Re e pret pa fishekzjarre 2022

12:08 31/12/2021

Australia nuk i ndahet traditës, pavarësisht pandemisë

Viti i ri 2022 nisi xhiron e festimeve me Auckland në Zelandën e Re. Por festa e parë e Vitit të Ri ishte më pak e zhurmshme se vitet e kaluara. Për shkak të pandemisë, spektakli tradicional i fishekzjarreve ishte zëvendësuar me shfaqjen e dritave përgjatë urës së famshme Horbour Bridge.

Për të shmangur grumbullimet masive si pjesë e masave kundër përhapjes së Omicron-it, qeveria u bëri thirrje qytetarëve ta shijojnë nga shtëpitë spektaklin e dritave që u transmetua live. Megjithatë, pati edhe qytetarë të pabindur që fishekzjarret i ndezën vetë.

Masa kundër Omicron-it janë në fuqi edhe në Australi, por autoritetet e Sidnejt nuk i ndryshuan planet. Shfaqja tradicionale e fishekzjarreve u zhvillua si çdo vit.

Në dallim nga pjesa tjetër e globit, vendet europiane i kanë anuluar spektaklet e fishekzjarreve prej pandemisë. Kryeqyteti i fundit që mori këtë vendim ishte Madridi. Festën e fishekzjarreve nuk do ta anulojë as Nju Jorku.

Tv Klan