11:54 07/05/2023
Autoritetet britanike thonë se diamanti iu dhurua familjes mbretërore në vitin 1905
Me rastin e kurorëzimit të mbretit Charles, zyrtarët në Afrikën e Jugut po u bëjnë thirrje autoriteteve britanike për të kthyer diamantin më të madh në botë të njohur si Ylli i Afrikës.
Ylli i Parë i Afrikës 530 karatësh u zbulua në vitin 1905, kur Afrika e Jugut ishte nën sundimin britanik, dhe dy vjet më vonë nga qeveria koloniale iu dhurua mbretit Eduard VII për ditëlindjen e tij të 66-të.
“Është një nder të kesh diamantin e Afrikës së Jugut, brenda dhe nën kontrollin e monarkisë britanike. Ai ka shumë rëndësi dhe promovon Afrikën e Jugut si një destinacion për pasurintë e saj siç janë minierat e diamanteve në Afrikën e Jugut”.
Teksa çështja e kthimit të veprave të artit po merr një rëndësi të veçantë kudo nëpër botë, në Afrikën e Jugut tani kërkohet që diamanti të kthehet në atdhe.
Mothusi Kamanga, një avokat dhe aktivist në Johannesburg, i cili ka promovuar një peticion online, ka mbledhur deri më tani rreth 8 000 firma, për kthimin e diamantit.
“Ne duam që diamanti të kthehet në Afrikën e Jugut, ku i takon. Të paktën do të na rikthejë dinjitetin dhe respektin për veten. Pra, është një çështje mjaft e rëndësishme mua”.
Edhe të tjerë janë të njëjtit mendim.
“Duhet ta kthejnë, se kur e kanë marrë nuk e kanë marrë ligjërisht, nuk e kanë kërkuar asnjëherë, na e kanë grabitur. Pra, duhet të kthehet edhe pse do të jetë e vështirë ta kthejmë, ne duan që diamanti ti kthehet Amerikës së Jugut”.
Ndërsa të tjerë thonë se kjo çështje i përket së kaluarës.
“Unë nuk mendoj se ka më rëndësi, gjërat kanë ndryshuar, ne po ndryshojmë. Ajo që kishte rëndësi për ta në kohët e vjetra për të qenë superior mbi të gjitha bazuar në të qenit britanik, tashmë për ne nuk ka më rëndësi”.
Kërkesat për kthimin e Yllit të Madh të Afrikës dhe diamanteve të tjera së bashku me thirrjet për riatdhesim janë intensifikuar që nga vdekja e Mbretëreshës Elizabeth.
Shumë afrikano-jugorë e shohin blerjen e xhevahireve nga Britania si të paligjshme, por autoritetet britanike thonë se diamanti i madh ishte një dhuratë për familjen mbretërore.
I njohur zyrtarisht si Cullinan I, diamanti në skeptër u pre në disa të tjerë.
Një diamant më i vogël i prerë nga i njëjti gur, i njohur si Cullinan II, është vendosur në Kurorën e Mbretit të Britanisë së Madhe, i cili mbahet nga monarkët britanikë në raste ceremoniale.
Së bashku me skeptrin, ai ruhet me bizhuteritë e tjera të kurorës në Kullën e Londrës.
Klan News
